Strandvandring i Klepp

Regnet valde å trekkja seg vekk under heile turen. I staden fekk me etter kvart sol og varme. Tjuefire personar gjekk i både lett og delvis noko tung sand litt over fire kilometer. 

Ved bunkersen på Reve måtte me ta ein runde i inndynelandskapet. Aud Lise Rosland hadde laga kjekke, litt vanskelege spørsmål til oss. Me sat i graset og grubla. Det var utruleg kjekt og festleg. Mange av spørsmåla hadde ho gitt svaret på i 2023 då ho heldt eit innlegg for oss på same stranda.

I tillegg til flott innslag frå Aud Lise Rosland, fekk me ei uventa oppleving. Ei gruppe frå Reve Ornitologiske Stasjon dreiv med merking av fugl. Me fekk sitja tett ved dei. Ein fuglemerkar viste oss polarsniper, steinvendar og lappspove. Ved å fylgja eit oppsett gjerde, kom me tilbake til stranda og vandra sørover til mål.

Neste onsdag, 28. august, kan du bli med å vandra frå Orre friluftshus til Vik. 

Strandvandring i Klepp 2024